نازلی یار عشق اودونا بیرده آلیشدیم
یئنه جانان لا كوسوب غم له باریشدیم
بیرده او دورنا گؤزون گؤرمگینه جانلا چالیشدیم
یئنه ده قان لا قاریشدیم
یئنه كؤنلوم نه اولوبدور توتولوبسان
هانسی لیلا سایاغا مجنون اولوبسان ، وورولوبسان
ندی دردین نیه بس قانلا دولوبسان؟
یار تك ، سنده اورك ، آتما منی
بیر خومارگؤز مارالین قایغی سینا ساتما منی
سنده جانان كیمی آلداتما منی
غم ایله ، ماتم ایله قاتما منی
یئتر آغلاتما منی
نه اولار سنده بیرآز مهر و محبت گؤره سن؟
دیل بیلن یارین اولا ، شوق ایله نازین چكه سن؟
یار سنین یارین اولا ، او قارا زولفون هؤره سن؟
بو قدر آغلاماییب بیر گوله سن؟
دونن آخشام یئنه گئتدیم گؤرم او نازلی یاری
وعده وئرمیشدی گله بیرده باری
نئجه اود ووردو منه او گؤروشون اینتیظاری
گلمه یین گئتمه یه قاتدی دلی كؤنلوم نیگاری
بیرده باخدی اوزومه ایسته دی گئتسین
دؤزمه دی سؤزلریمی كامیل ائشیتسین
نه اولوردو او منیم حالیمی بیلسین
بیر قدم گوتدو چاغیردیم:
نه اولور گئتمییه سن
منی ترك ائتمیه سن
دؤندو باخدیم اوزونه
دوشدو یالوارماغا دیل، آغلاماغا گؤز
گئتمه بیر دؤز
سنه یالوارمیرام، آمما
بونو یالوارماق حئسابلا
اوخ اولوب باغریما باتما
منی آتما
دؤندو تحقیر ایله باخدی
غم اوخون قلبیمه تاخدی
كؤنلومو اودلادی یاخدی
دئدی:آخیر نه دئییم باشقا یاریم وار
سنه من سؤز وئره بیلمم، اؤزومون سؤز وئرنیم وار
نه یامان وئردی جواب او سؤزومه
بیر زامان چیخدیم اؤزومدن ، یئنه گلدیم اؤزومه
اوندا بیلدیم كی گئدیبدیر او گوزل یاریم الیمدن
نئجه اینصاف ائلدی او آییران جانی تنیمدن
ایكی ال بیر باشیم اولدو
ائله بیل یوز یاشیم اولدو
بوغازیم توتدو قهر، باتدی سسیم
ائله بیل كی كسیلیردی نفسیم
اودا باخماقلا منه گؤزلری دولدو
سارالیب هئیوا كیمی ، گول كیمی سولدو
آغلادیق هر ایكیمیز یاش توكنینجه
بو صداقتلی سئوینجه
گؤزو آغلار سسی سیزلار، دیله گلدی
سانكی بی دین ، دینه گلدی
دئدی ، سن هر نه دئمیشدینسه ایناندیم
سنی مجنون كیمی ساندیم
سنی یاندیرماغا یاندیم
چوخ اوتاندیم
من سنین عشقینه لاییق دئییلم
بیه مندن سورا گؤز قاره سی یوخدور،
آیریلیق دیر یولوموز
چاره سی یوخدور
بو سؤزایله گئدرك آتدی منی
غم ایله ، نیسگیل ایله قاتدی منی
آخ نئجه آغلاتدی منی
یاندی قلبیم اودونا ، توستوسونه عشق بوغولدو
وئردیگیم قول شرف سیندی اوغولدو
گلد یورغون سره لندی
گؤزلریندن یاش الندی
توتدو اوز تانریا ، قیشقیردی باغیردی:
هئچ كیمین سئوگیسینی باشقاسینا یار ائله مه
منی بوندان دا بؤیوك درده گرفتار ائله مه
آغلاماقدان دا یورولدو
سیلدی گؤز یاشلارینی سوسدو بوغولدو
آچدی غم دفترینی قان ایله یازدی:
منی هئچ كیمسه اینانماز
سؤزومو دردیمی قانماز
دوشر عاشیق اودا البت
هئچ كیم آنجاق ، بئله یانماز
، ,منی ,ایله ,بیر ,غم ,یئنه ,غم ایله ,منی غم ,ائله بیل ,نازلی یار ,ائله مه ,اودونا بیرده آلیشدیم
درباره این سایت