دۆن گئجه یوخودا گؤرموشم سنی
سانیرام یوخومو، ائوین بیلمیشدین
سونونجو شعریمی دینلهمک اۆچون
دۆن گئجه یوخوما قوناق گلمیشدین
سن هارا؟ کابوسلو یوخولار هارا؟
دۆن گئجه دئیهسن یول ایتیرمیشدین
ظلمتی سؤندورَن چیراقلار کیمی
قارانلیق گئجهمه نور گتیرمیشدین
سؤز آچدیم سئوگیدن، سؤز آچدیم سنه
سئوگی زنجیرینده اسیرم دئدیم
دیلیم سؤزلریمی توتا-توتمایا
سسیم اسه-اسه، سئویرم»دئدیم.
اویاندیم، فکرلر بۆرودو منی
یوخومو عمرومون حسرتی ساندیم
سنینله برابر اولان یوخودان
اؤزومده بیلمیرم، نییه اویاندیم؟!
محبّت دنیادان کؤچمهییب اَیَر
بس نییه سئوگیمیز یوخونو سئچیر؟!
بلکه گرچک یوخو حیاتیمیزدی!
بلکه گرچک حیات یوخودا کئچیر!
ایندی سون شعریمی اوخویوب سنه
یوخومو آلارام حیاتیمیزا
او شیرین یوخودان، شعرین گۆجویله
بیر کؤرپو سالارام حیاتیمیزا
دۆن گئجه، یوخوما گلمیشدین دئمک!؟
یوخودا گؤرَرمیش سئون-سئونی!
سئوگیلیم! سؤزومو غربته سالما
دۆن گئجه یوخودا سئومیشم سنی.
اکبر شفیعی
دۆن ,یوخودا ,گئجه ,سنی ,سنه ,آچدیم ,دۆن گئجه ,گئجه یوخودا ,سؤز آچدیم ,بلکه گرچک ,گؤرموشم سنی ,گئجه یوخودا گؤرموشم
درباره این سایت